Mar 10 | WSK | STEP | Jesus barasam Capernaum wonong beteram ale Judea sor te namaram ale yu Jordan komasang te namaram. Se kariimet suen biya akingtala kote taiman, se nu pempem bitakaso butata Kaem den nunga manarukaso.

Mark 10

Jesus nuwus-kuari numi mera ko den balam

(Mat 19:1-12; Luke 16:18)

1 Jesus barasam Capernaum wonong beteram ale Judea sor te namaram ale yu Jordan komasang te namaram. Se kariimet suen biya akingtala kote taiman, se nu pempem bitakaso butata Kaem den nunga manarukaso.

2 Se Pharisee kari saki nu kote taiman ale ira aringimonko iwita isarman: “Se anananga Law Den awuk balso ya? Kari bo ko nuwus am karuk agi, me karuk e?”

3 Se Jesus nunga den koma ko nunga isuam, “Law Den awuk bore karo tualko ningaram?”

4 Se nuna balman, “Moses balam kari noko nuwus karukko mu nu girok tam gawa bilik te iwita batoga bo bataguk ale baluk, ‘Ani imet imi karosam,’ ma baluk, ale tam gawa mu imet tuok se iluwok ale asele karukko.” ^{▼▼Mark 10:4 Deuteronomy 24:1-4.}

5 Se Jesus nunga maonam, “Nenenga nengemang motam aora biya mu ko Moses munan den mu ningaram. 6 Bare duap te nunguningkiri, tom Kaem mel suen biya beteram tom mu te, nu ‘kari beteram, ale imet beteram’. 7 Se ‘umutang ko kari mu ko nuet nuam nunga awurok ale ko imet ilak kapeturuk, 8 se nuna ilagala mu suwanta bagomonko.’ ^{▼▼Mark 10:6-8 Genesis 1:27; 5:2; 2:24.} Se udagi mu nuna ilagala kirker mena, bare suwanta diram. 9 Buta se Kaem kari imet nunga biguwuram, mu udagi kari bo me nunga batagukko!”

10 Udagi Jesus ko olekem arungu kawam te peleman namaman ale olekem alo nu den balam mu ko isarukasan. 11 Se nu nunga maonam, “Kari awiriya noko nuwus beteso ale imet bo iru taso, mu nu noko nuwus laun memek te beteso, ale nu nuwus-kuari ko munan maguwuso. 12 Se koma suwanta tala, imet awiriya noko kuari beteso ale kari bo iru taso, mu nu betela nuwus-kuari ko munan maguwuso.” ^{▼▼Mark 10:11-12 Nuwus-kuari numi mera ko den: Mat 5:32; 1 Cor 7:10-11.}

Jesus kuriang gotektek marak nungaram

(Mat 19:13-15; Luke 18:15-17)

13 Kariimet saki nononga kuriang arungu Jesus kote taikasan. Nononga nongomang Jesus ko kuting kuriang nungumik te bitirukko. Bare noko olekem alo kariimet ining nungarukasan.

14 Se Jesus munan mu arigam ale gomang ikuwuram, se ko nunga maonam, “Nina kuriang gotektek me nunga kaoralko, am nunga awural se aningate taimonko. Mu awuk, Kaem ko kingdom mu kariimet kuriang gotektek es ta imitang iwitata wore nunga. 15 Ani nunguningta ninga manorsam, nina ninimi gurugal ale kuriang gotektek imi nunga turan me aratal, mu nina Kaem ko kingdom ningi me ta kasu naguralko.”

16 Jesus buta balam asele nu kuriang gotektek mu nunga tagi gurugu koma te nunga awuram, ale suwan suwan kuting nungumik te beteram ale marak nungaram.

Kari bo ko mel suen biya karogo wore Jesus isa bo tuam

(Mat 19:16-22; Luke 18:18-23)

17 Jesus duap beteram aolak iluwaram se kari bo naguram kote tairam, ale doleng duap bugura kulukuam ale isuam, “Nanga kari biya yawara, ani awuk maik ale marak yawara tom suen biya te bagirikko wore taikko ya?” mam.

18 Se Jesus nu maonam, “Ni anape ko aninga balsam ‘Kari biya yawara’ masam? Kaem kota suwanta diram yawarakala. 19 Ni munan Kaem Moses tuam se batogam mu suen biya iki kutuwurem: ‘Ni kari bo me moar se kuerukko. Ni saman katagot bitar ale nuwus-kuari ko munan me maguwurko. Ni me tere noko. Ni kari bo kumik te den kawel me baluko. Ni kaweler ale kari bo ko mel me giko. Ni niet niam nuguring karo tui se nunup patawurko.’” ^{▼▼Mark 10:19 Exodus 20:12-17.}

20 Se kari mu Jesus maonam, “Kari biya,” mam, “tom ani kuriang gotek la tai aitak, mu ani munan imi suen la karo tui saperem.”

21 Se Jesus kari mu arikuawuram ili nama laga, gomang tui se maonam, “Mel suwanta ni me beterem. Ni namar ka melmasak suen la dia sapar, ale ko manga to ale kariimet nungumik mel mena mu nungaruko. Ni uwuta bitar, mu nika mel yawara yawara duruk wonong te anirukko. Asele tair ani agowom karoko.”

22 Se kari mu den umutang ikiam gomang batagam se maigam ale namakaso. Mu awuk, nu ko manga mel singir biya karogo se.

Kariimet nungumik mel suen biya ago nunga den

(Mat 19:23-30; Luke 18:24-30)

23 Se Jesus loagaram gurugam ale ko olekem nunga maonam, “Kariimet nungumik mel suen biya ago mu nuna Kaem ko kingdom ningi kasu nagumonko mu ura kowar nunguningkiri.”

24 Se olekem alo den mu ikiman ale biririkiman.

Bare Jesus akingtala nunga maonam, “Aga kuriang alo,” mam, “kariimet Kaem ko kingdom ningi kasu nagumonko mu ura kowar nunguningkiri. 25 Se camel mu guang te birira ko nil ko gogong gotek mu ningi kasu nagurokko mu ikup biya. Bare kari ko manga melmasak suen biya, mu Kaem ko kingdom ningi kasu nagurokko mu ikup biya nunguningkiri!”

26 Se olekem alo den mu ikiman ninguru tala tengeman, ale nuna nongota nunumi isarukasan, “Buta mu arika marak yawara tom suen biya te bagomonko mu tamonko ya?”

27 Se Jesus nungarki se nunga maonam, “Kariimet mel imi betemonko me terong. Bare Kaem mu mel suen biya bitirukko terong mam.”

28 Se Peter nu maonam, “Ana nanga mel suen la awu beteman ale ni kewom karoman.”

29 Se Jesus balam, “Ani nunguningta ninga manorsam, kariimet ani agowom karo se den gilalong yawara balmonko mu ko nunga wonong kawam, nunga ningam, nunga nunam nonet, launuria, korasari, kuriang, nunga awu beteman, 30 mu nuna tom imi te koma biyala nunguningkiri tamonko, ali se kawam, launuria korasari, nunam, kuriang suen biya nunguningkiri tamonko. Se kariimet saki nunga bita maguwumonko tala! Bare tom udagi mu nuna marak yawara tom suen biya te bagomonko mu tamonko.

31 “Bare ikialko. Kariimet suen biya aitak gira motam te anisan, mu udagi te nukum te biya pelemonko. Se kariimet suen biya aitak nukum te biya anisan, mu maingte gira motam te nunguningkiri bagomonko.”

Jesus akingtala balam nu kueruk ale aking barasukko mam

(Mat 20:17-19; Luke 18:31-34)

32 Nuna Jerusalem namomonko lage karoman ale nama se animan. Se Jesus mu giram namakaso. Se ko olekem kowom karoman bare nungamin yena yena namakasan. Se kariimet saki nuna nogowom karoman mu nuna ago nguangakasan.

Se Jesus ko olekem 12 mu nunga giam ale arungu tagi tam, ale mel nu kumik te aratukko wore aking nunga manarukaso. 33 Ale balam, “Ikialko,” mam, “ana aitak Jerusalem namasan. Se mu te kari sang Kari ko Kuriang wore priest bibiya se Law Den ko kausa kari bibiya nuguting te betemonko. Se nuna isa tumon ale balmon, ‘Am kuerukko’ mamon, ale sor saki ko kari Juda mena mu nuguting te betemonko. 34 Se nuna gusira den manarmon, ale dolara tumon ale katingurmon, ale lilumomon, ale momon se kuerukko. Bare nama tom ilagala suwan mu te nu aking barasukkowo.”

James John ilak kari bibiya ko bagomonko Jesus isarman

(Mat 20:20-28)

35 Udagi Zebedee ko kuriang ilagala James John ilak Jesus kote taiman manorman, “Kari biya,” maman, “ana mel bo ko nika isarnakko, se ni mel mu nunguru nangaruko.”

36 Se Jesus nunga isuam, “Nina anape mel ani bita ningarikko kuesan a?”

37 Se nuna balman, “Tom ni King Biya ko aratu mu ko tom te ni balu se ana ilagala bo kiting sengam mu te, se bo kiting ngas mu te daginakko.”

38 Bare Jesus nunga maonam, “Nina ilagala mel ko aninga isarman mu ko duap ninguru me ikisan. Nina ikup ani giekko mu nina am gial i? Ani ikup yaman giek ale kuerikko. Se nina uwutatala am ikup gial ale kueral i?” ^{▼▼Mark 10:38-39 Bagunang te balam se anuwa ta te balam umutang ikup gia.}

39 Se nuna balman, “Ana butata am betenakko,” maman.

Se Jesus aking nunga maonam, “Ikup ani aisimon mu nina ago ningarmonkowo, yaman ani aisimon mu nina ago ningarmonkowo. 40 Bare nina ilagala ninga isa, nina kari bibiya ko aratal ale bo aninga agiting sengam mu te, se bo agiting ngas mu te daigalko balsan, bare ani nenenga balikko me terong. Mel mu Kaem ko mel. Nu maingkala kari kuwim mu te dagimonko mu nunga balam.”

41 Se olekem 10 mu James John ilak mel beteman mu ko den ikiman, ale nogo ko nongomang ninguru magaram.

42 Se Jesus olekem suen la nunga auram se taiman, se nunga maonam, “Nina ikisan, ali sor saki ko kariimet nunga supuling mu kariimet ninguru nunga ira kutuwu karogo kapasan, ale nononga ikia te la nunga bitarsan. 43 Bare nina ningi munan umu me ta anirukko. Mena. Awiriya nu nina ningi biya bagurukko kueruk, mu nu ura kari yam iwita nenenga saonga bagurukko mu asele. 44 Se awiriya nu gira nup biya bagurukko kueruk, mu nu suen la nunga ura dungan kari iwita bagurukko. 45 Mu awuk, Kari ko Kuriang betela tala kariimet noko ura dungan betemonko me tairam. Mena. Nu kariimet nunga sangukko tairam. Ale kueruk ale ko gue te kariimet suen biya nunga dia taukko tairam.” ^{▼▼Mark 10:45 Jesus nanga dia taukko tairam: 1 Tim 2:5-6.}

Jesus Bartimaeus motam nungam

(Mat 20:29-34; Luke 18:35-43)

46 Nuna tai Jericho arataman. Se Jesus ko olekem arungu kariimet suen biya ago wonong mu bitawaman, se Timaeus ko namar Bartimaeus, nu motam sisira, nu lage kinikan ko daigam baga se, manga melmasak ko kariimet nunga ngatangaruwakaso. 47 Nu Nazareth kari Jesus taiwaram mu ko den ikiam ale aira duap beteram biyala aikaso, “Jesus, ni David ko Kuriang, ni gemang aisuko!” 48 Se kariimet saki nu ining tuikasan, “Ni kutek meko!” makasan. Bare nu am biyala aikaso, “David ko Kuriang, ni gemang aisuko!” makaso.

49 Se Jesus tai sanamaram ale balam, “Aural se tairukko,” mam.

Se nuna kari motam sisira mu manorman, “Gemang amilmil ago baresko! Jesus nika aruso.” 50 Se nu tairate noko guang bo kutuwu saparam, ale barasam Jesus kote namaram.

51 Se Jesus nu maonam, “Nika gemang ani QQQ anape/kimik te awuk maikko kuesam a?”

Se kari motam sisira nu maonam, “Aninga Biya, ani loagirik sor arigekko kuesam.”

Se Jesus nu maonam, “Ka bo namarko! Nika gemang ningi nunguning ka nungam se nungerem.”

Se tairate kari mu motam nungeram se sor arikaso. Ale nu Jesus kowom kaoram ale ilak namakaso.

52